Deputetët e opozitës janë bërë pjesë sot e komisionit të posaçëm për reformën në drejtësi, pasi shumë kohësh bojkot.
Pas miratimit të ndryshimeve kushtetuese mbrëmjen midis 21 dhe 22 korrikut, tashmë pritet të diskutohet dhe më pas të miratohet paketa e 7 ligjeve që mundësojnë zbatimin në terren të këtyre ndryshimeve.
Në mbledhjen e komisionit të posaçëm, kanë mbërritur deputetët demokratë Oerd Bylykbashi, Arben Ristani dhe Gent Strazimiri si dhe republikani Fatmir Mediu.
Bashkë me ta është edhe eksperti Gazmend Bardhi. Nga socialistët, në komision kanë shkuar deputetët Fatmir Xhafaj, kryetar i komisionit, si dhe kolegët e tij Vasilika Hysi dhe Ulsi Manja.
Më herët, deputetët demokratët zhvilluan një takim me Bashën. Ligji i parë që do të diskutohet është ai i Vettingut që ka të bëjë me vlerësimin e gjyqtarëve.
Përfaqësuesit e Partisë Demokratike janë larguar nga mbledhja e komisionit të posaçëm për reformën në drejtësi.
Deputeti demokrat Oerd Bylykbashi, tha se kishin parashtruar shqetësimet e opozitës në mbledhjen e komisionit.
Burime nga mbledhja bënë me dije se gjatë ditës së sotme ishte rënë dakord për të dëgjuar dhe diskutuar në parim shqetësimet e opozitës. Ndërsa për detajet teknike do të ketë diskutime në nivel ekspertësh. Këto shqetësime i ka prezantuar deputeti demokrat, Bylykbashi.
