Policia ka shoqëruar të dyshuarit e parë për vrasjen e rojës së serave në Fier. Mësohet se mes të shoqëruarve është edhe një çoban.
Hetimet vijojnë ndërsa policia po ushtron kontrolle në kodrën përkarshi serave dhe kabinës ku u gjet i pajetë roja.
Dëshmia e të shoqëruarve pritet të japë dritë për zbardhjen e së vërtetës.
Pistat e hetimit janë disa, nga konfliktet e momentit e ato banale, deri tek konfliktet e mëparëshme që mund të ketë pasur viktima me persona të tjerë.
67-vjeçari u gjet i vrarë në vendin e punës. Ngjarja ndodhi në një serë të kultivimit të perimeve, ku i moshuari punonte prej disa kohësh.
Do të jenë pikërisht kamerat e sigurisë së objektit ato që do të hedhin më shumë dritë mbi ngjarjen dhe mund të çojnë në identifikimin e autorit.
Nuk dihen ende motivet e kësaj ngjarjeje. Pritet të merren në pyetje familjarët e viktimës për të zbuluar nëse viktima ka patur konflikte ose mosmarrëveshje me ndonjë person tjetër, që mund të jetë bërë shkak për këtë ngjarje.
Po ashtu policia po heton mbi të shkuarën e 67- vjeçarit Petraq Gjika. Në vendngjarje ka shkuar grupi hetimor dhe po punohet për zbardhjen e kësaj ngjarje.
