Kreu i Grupit Parlamentar të Lëvizjes Socialiste për Integrim, Petrit Vasili ka reaguar pas dy ngjarjeve të rëndë të ndodhur dje në dy institucione të vuajtjes së dënimit.
Bëhet fjalë për zjarrin që përfshiu dje burgun e Shënkollit në Lezhë, ku humbi jetën një i dënuar dhe për plagosjen e një tjetri të burgosuri në burgun e Vaqarrit.
Vasili thekson se pasiguria në burgje është e patolerueshme dhe kërkon që çdo zyrtar të bëjë detyrën ose të ndëshkohet.
“Pasiguria në burgje është e patolerueshme. Të marrë fund papërgjegjshmëria dhe pandëshkueshmëria. Çdo zyrtar të bëjë detyrën ose të ndëshkohet”, deklaron Vasili.
Flamur Sulaj humbi jetën dje dhe u gjet i asfiksuar pa shenja jete në banjën e burgut të Shënkollit, ndërsa ngjarja dyshohet se erdhi pas shpërthimit të një bombole gazi. Gjithsesi çështja është në hetim dhe mbetet ende e paqartë. Po kështu dje në burgun e Vaqarrit në Tiranë u qëllua me armë nga jashtë, ndërsa ishte në ambientet e ajrimit kosovari Lili Dulaj. Ai ndodhet jashtë rrezikut për jetën.
