Vetëm pak kohë pas dorëheqjes së tij nga posti i Teatrit Kombëtar të Operas dhe Baletit, Ilir Kerni ka reaguar me anë të një statusi në rrjetin social, facebook. Në reagimin e tij ai kritikon buxhetin e ulët të Ministrisë për TKOB, si dhe falenderon me përulësi artistët dhe punonjësit e administratës.
“Gjërat e bujshme kurrë s’i kam dashur, lutem pak vëmendje për të njohur faktet! Vetëm 28 muaj pune për të transformuar gjithçka, me punë, punë dhe vetëm punë. Me buxhetin me të ulët historik… shpenzimi mesatar për një shfaqje nuk kalon te 600 eurot, pra mund të hyjmë në rekordet “guinness”. Kemi kthyer mbi 200 milion lekë buxhetit të shtetit nga biletat, për rrjedhim shpenzimi mesatar del edhe më i ulët. Vetëm Kosova, pa përmendur vendet e rajonit, ka 9 herë më shumë buxhet për programin artistik. Kjo është koha e pasionit, përkushtimit, shpresës dhe idealit të pastër për Operan e vetme në trojet shqiptare.
Falenderim me përulësi për artistët e mrekullueshëm, stafin e produksionit dhe administratën perfekte. Falenderim me përulësi per artistët famozë shqiptar në botë, kontributi i të cilëve ishte gratis në ndihmë të shtëpisë tonë të përbashkët. Dhe sa e sa gjëra të tjera janë bërë…28 muaj punë gjigande.
TKOB Albania e pakrahasueshme me asgjë tjetër në këtë vend. Ps. Fundi i pjesës parë !”, citohet në mesazhin e Kernit.
Pavarësisht dorëheqjes së tij, motivet e vërteta ende nuk dihen. Mendohet se Kerni “u detyrua” të jepte dorëheqje, pasi prej disa kohësh nuk kishte marrëdhënie të mira me Ministrinë.
