Presidenti Turk, Rexhep Taip Erdogan njoftoi pushimin e të gjitha çështjeve për personat që akuzohen se e kanë ofenduar atë. Erdogan tha se ky vendim i tij u frymëzua nga uniteti që shfaqën qytetarët gjatë dhe pas grushtit të dështuar të shtetit.
Autoritetet turke thonë se nga ky vendim i Presidentit do të lirohen nga akuza e ofendimit mbi 2 mijë persona.
“Do të tërheq të gjitha paditë që kanë të bëjnë me ofendimet dhe mungesën e respektit ndaj meje. Disa njerëz po na japin këshilla. Thonë se janë të shqetësuar. Shikoni punët tuaja! Asnjë person nga Bashkimi Europian apo Perëndimi nuk i ka ofruar ngushëllime Turqisë. Këto vende, këta udhëheqës që janë të shqetësuar për puçsitët, nuk mund të jenë miqtë tanë”, tha Erdogan.
Duke folur nga pallati presidencial, Erdogan u shfaq i zbutur në qëndrimet e veta edhe për vendet perëndimore, që i ka kritikuar jo pak që pas përpjekjes ushtarake për të rrëzuar atë.
