Disa nga deputetët socialistë nuk firmosën sot në propozimin për president. Madje kujtojmë se disa nga ata bojkotuan edhe procesin me zarfe për emrin e presidentit. Por, kryeministri Edi Rama duket se ka vendosur që Bajram Begaj do të bëhet president dhe për këtë arsye iu ka dhënë një porosi të gjithë deputetëve “rebelë”. Ai tha se vota për kandidatin për President të ri të vendit, Bajram Begaj në Kuvend, pasditen e të shtunës, do të jetë unanime nga ana e Partisë Socialiste.
Ky ishte një “mesazh i prerë” për deputetët e pranishëm në mbledhjen e grupit parlamentar, pasi Rama tha se do të votohet “në unanimitet të plotë e s’ka nevojë të diskutojmë për këtë”. Rama ndër të tjera zbuloi se ka pasur deputetë socialistë që nuk kanë marrë pjesë në procesin e propozimit të tre emrave me zarfe për kandidatin për president.
“Më vjen keq për ndonjë deputet apo deputete që nuk u përfshi në këtë proces duke menduar se zarfet janë punë për mosha të reja dhe jam i bindur që herën tjetër të gjithë do të përfshihen se është e qartë se ku çon procesi. Por pavarësisht nga kjo jam i bindur që dhe ndonjë që nuk u përfshi në fillim e gjen veten te kandidatura e Bajram Begajt për të cilën grupi do votojë në unanimitet të plotë e s’ka nevojë të diskutojmë për këtë në aspektin e vendimmarrjes politike për votimin e presidentit të ri të Republikës”, u shpreh ai.
Gjatë fjalës në mbledhjen e grupit parlamentar socialist, Rama tha se procesi i diskutimit për kandidatin për President, që solli në propozimin e Bajram Begajt, nuk ka qenë i lehtë. Rama tha se kandidatura e PS duhet të plotësonte kërkesa shumë specifike.
