Sekretari i Përgjithshëm i Partisë Socialiste Damian Gjiknuri, në tryezën e sotme për zgjedhjen e presidentit, ftoi opozitën të dërgojë katër emra si kandidatë për zgjedhjen e presidentit. Gjiknuri u shpreh se ky do të ishte maturimi i opozitës ndërsa i kërkoi kësaj të fundit të mos paragjykojë maxhorancën. Sipas tij, maxhoranca ka detyrim ndaj qytetarëve dhe vendin do ta pajisë me president.
“Hajde të ulemi pasdite që sot. Na vini në provë për sinqeritetin e bashkëpunimit. Po e themi shumë miqësisht këtë gjë. Këtë vendim e kemi marrë me njëri tjetrin. Sillni katër emra po të doni. Nuk është normale të rrimë para kamerave të flasim me orë të tëra. Kjo do të ishte maturimi i opozitës. Të vinte të ulej me maxhorancës dhe të sillte emrat që kemi vendosur me njëri tjetrin. Hajde në tavolinë negociatash. Hajdeni me dy tre emra dhe na jepni shansin dhe ne dhe mos na paragjykoni. Po qe për paragjykim kushtetuta e ka zgjidhur. Ne nuk do ta lëmë vendin pa president. Maxhoranca ka detyrim ndaj qytetarëve dhe vendin do ta pajisë me president. Çdo gjë tjetër këtu është politik. Na dëgjojnë njerëzit para kamerave. Ne nuk jemi studio televizive. Unë mendoj që ti e ke mundësinë dhe e ke dhe aftësinë e lidershipit që të mos kërkosh sigurinë nga kamera por të mbledhësh njerëzit e tu dhe të propozosh katër emra”, tha ai.
