Pranvera është stina e preferuar e shumë njerëzve. Natyra po zgjohet përsëri, dhe bashkë me të, sikur zgjon tek njerëzit dëshirën për romancë dhe dashuri. Ndoshta në pranverë, kur natyra lulëzon, moti bëhet më i ngrohtë dhe ditët më të gjata, keni ndjerë dëshirën për shëtitje romantike së bashku.
Nëse po, dijeni që nuk jeni i vetmi, sepse kjo u ndodh shumë njerëzve. Sipas neuroshkencëtares Helen Fischer, profesoreshë në Universitetin Rutgers dhe autore e pesë librave mbi dashurinë, ka një shpjegim shumë të thjeshtë shkencor për këtë. Bëhet fjalë për punën e hormonit dopamine.
Sipas Dr. Fischer, reagimi i dopaminës nxitet nga shfaqja e gjërave të reja dhe pranvera është një stinë plot risi. Sapo vjen moti i bukur dhe i ngrohtë, truri padashur bëhet një “fabrikë” dopamine, duke iu kthyer në një romantik të pandreqshëm që është i varur nga dashuria, sepse dopamina është e njëjta substancë që shkakton varësi nga disa substanca.
“Ka shumë më tepër ngjyra rreth jush, aroma të reja, njerëz të rinj. Pra, ka shumë stimulues të rinj që lëvizin trurin dhe rrisin nivelet e dopaminës dhe ju bëjnë më të ndjeshëm ndaj dashurisë”, tha ajo.
Fischer shton se dopamina është një kimikat natyral që truri juaj e përdor për t’ju bërë të dëshironi gjëra. Në dashuri përfshihen edhe sisteme të tjera, por kur bëhet fjalë për dëshirën për dashuri të re, fajtori kryesor është dopamina dhe pikërisht për shkak të saj, njeriu është më i prirur për t’u dashuruar në pranverë.
