Deputeti i partisë demokratike, Saimir Korreshi me anë të një lidhje skype ditën e sotme ka dhënë një intervistë për “Fax News” ku ka folur mbi mbledhjen e zhvilluar nga Këshilli Kombëtar i partisë Demokratike.
Gjatë fjalës së tij ai është shprehur se sa i përket shkarkimit të Alibeajt dhe miratimit të rezolutës së sotme dhe përsa i përket zgjedhjes së presidentit, këto i cilëson si lëvizje të pritshme.
Gjithashtu, Korreshi shtoi se në këtë mënyrë nuk po zhvillohej një proces përbashkues dhe se 6 apo 7 deputetë të Rithemelimit nuk mund t’u imponoheshin rreth 40 të tjerëve.
“Pritej kjo nismë, nuk ka ndodhur asgjë e re. Por kanë një gjë, që kanë mandatuar grupin Janë 6 apo 7 deputetë që duan t’ju imponohen 40 të tjerëve. Epo mirë qenka mirë kështu. Të dëgjojmë ne tani se çfarë do thonë këta. Ne shyqyr që po na vjen ndonjëherë fjala të flasim. Ne prandaj i kërkuam dorëheqjen Bashës se nuk na vinte fjala, tani këta duan të na frenojnë. Të vijnë atje në grupin parlamentar dhe të flasin. Pse kanë marrë më shumë vota këta?”
Së fundmi, Korreshi e mbylli fjalën e tij duke u shprehur se tani që është larguar Lulzim Basha duhet të bashkojnë demokratët.
“Nuk isha në Kuvendin e PD-së. Ne kërkuam që gjithë procesi të jetë përbashkues. Në datën 12 mars iku Lulzim Basha me presionin e këtij grupi parlamentar. I gjithë grupi parlamentar kërkonte që ne të ulemi dhe të shohim njëri-tjetrin në sy. Iku Basha tani duhet të bashkonim demokratët. Një palë nga rithemelimi dhe pala tjetër të uleshin dhe të dakordësoheshin. Sot u emëruan delegatë disa persona të cilët po t’i vësh para demokratëve nuk e di çfarë mund t’u thonë. Nuk mund t’u imponohesh 40 kolegëve të tjerë siç po kërkojnë deputetët e Rithemelimit.”
