Faton Haxhaj është një 26-vjeçari nga fshati Greikoc i Suharekës, i cili ka humbur dje jetën në mënyrë shumë të mistershme. Burime bëjnë me dije se ai u gjet në gjendje të rëndë në shtëpinë e tij dhe më pas është dërguar në Emergjencën e Suharekës me plagë të rënda trupore, të cilave s’ka arritur t’ju mbijetojë. Sakaq, kujtojmë se afër shtëpisë së ti policia ka gjetur një kallash, e cila e ka cilësuar si vdekje të dyshimtë dhe që mbart prapa një histori më të thellë. Ku pistat e para janë larje hesapesh apo hakmarrje.
Sipas policisë, ai ka mbërritur në Qendrën Emergjente të Suharekës rreth orës 15:05, me lëndime trupore që dyshohet se ishin shkaktuar nga arma e zjarrit. “Pas marrjes së informatës, njësitë e Policisë kanë dalë në vendin e ngjarjes, në fshatin Greikoc të Suharekës dhe në një objekt përcjellës, 20 deri në 30 metra larg shtëpisë së viktimës, është gjetur një armë AK-47 e cila dyshohet se është përdorur në këtë rast. Në vendin e ngjarjes ka dalë edhe prokurori i shtetit dhe rasti është duke u trajtuar si “Vdekje e dyshimtë”. Me urdhër të prokurorit trupi i pajetë i viktimës është dërguar për procedura të mëtutjeshme në Institutin e Mjekësisë Ligjore”, ka deklaruar Gashi, drejtori i policisë.
Pas vdekjes së tij, ka reaguar deputetja e Kuvendit të Kosovës nga radhët e Aleancës për Ardhmërinë e Kosovës, Albana Bytyqi. Ajo ka zbuluar se 26-vjeçari ishte djali i dëshmorit Haxhi Haxhaj dhe pse jo dyshohet që ngjarja të ketë lidhje me histori të vjetra. Bytyqi e cila vjen nga kjo komunë shtoi se Haxhaj ishte djalë punëtor e aktivist i pashembullt.
“Pikëllues dhe i rëndë lajmi për vdekjen tragjike të Faton Haxhaj, djalit të dëshmorit Haxhi Haxhaj nga Grekoci i Suharekës. Fatoni ishte një djalë punëtor, i dashur e aktivist i pashembullt. Ngushëllimet më të sinqerta familjes, të afërmve dhe gjithë atyre që e njohën. Dritë të pastë shpirti Faton”, shkroi ajo në llogarinë e saj në Facebook. Sakaq, policia deklaron se po heton në dy pistat e përmendura më lartë, ndërsa ende nuk ka asnjë të dyshuar, por po iu bëhen ekzaminimet e nevojshme materialeve të gjetura në shtëpinë e të ndjerit.
