Vendi ynë renditet në një shtet që ka cilësinë më të dobët të universiteteve në rajon. Ky rezultat është publikuar nga “Ranking Web of Universities”, ku duket se vendi ynë është nga fundi edhe në rang botërorë. Lidhur me këtë çështje ka reaguar presidenti i vendit Ilir Meta, i cili përmes një postimi në Facebook ka publikuar të dhënat dhe ngre alarmin e kuq. Sipas tij, këto të dhëna janë tronditëse për sistemin e arsimit në vend por edhe për shoqërinë në tërësi. Prandaj, ai i bën thirrje qeverisë dhe institucioneve përgjegjëse të reagojnë sa më shpejt, në të kundërt shoqërinë tonë e pret një katastrofë arsimore.
“Renditja e Shqipërisë, e fundit në rajon në klasifikimin botëror të cilësisë së universiteteve sipas “Ranking Web of Universities” por edhe sistemeve të tjera të besueshme të vlerësimit akademik, është tregues i tronditjes së rëndë të cilësisë së Arsimit të Lartë dhe sinjal alarmi për shoqërinë në tërësi. Është një thirrje për reflektim të menjëhershëm nga Qeveria, Kuvendi dhe shoqëria civile në tërësi për ndërmarrjen sa më parë të reformave reale dhe të besueshme për rivendosjen e standardeve të larta konkurruese dhe uljen e fiktivitetit në Arsimin e Lartë.
Këto reforma strukturore e funksionale dhe veçanërisht depolitizimi i sistemit arsimor, janë kusht dhe domosdoshmëri për rritjen e besimit dhe shpresës te të rinjtë tanë për të studiuar, qëndruar dhe ndërtuar jetën dhe karrierën e tyre në Shqipëri”, shprehet ai.
Presidenti shprehet se, arsimi duhet kthyer në përparësi kombëtare për të ndalur fenomenin e shpopullimit dhe garantuar zhvillim të qëndrueshëm, progres dhe të ardhme të sigurt europiane.
