Dy agjentë të bursës kanë rënë në pranga ditën e sotme në Tiranë. Bëhet me dije se në kuadër të operacionit policor të koduar “Trick” u bë arrestimi në flagrancë, për veprat penale “Mashtrimi”, “Fshehja e të ardhurave”, “Mospagimi i taksave dhe tatimeve” dhe “Pastrimi i produkteve të veprës penale ose veprimtarisë kriminale”. Të dhënat tregojnë se kanë rënë në pranga Blerin Kamberaj, 37 vjeç dhe dhe Roland Kamberaj, 40 vjeç, banues në Tiranë, të dy administratorë në një call -center.
Gjithashtu, në vijim të veprimeve u proceduan penalisht shtetasit S. D., 40 vjeç, dhe E. M., 34 vjeç. Nga veprimet hetimore të kryera ka rezultuar se këta shtetas, nëpërmjet një subjekti call -center, u prezantoheshin si agjentë burse, shtetasve të huaj, të cilët i mashtronin që të investonin në platforma online. Nëpërmjet mashtrimit, këta shtetas, në bashkëpunim me njëri-tjetrin, në periudha të ndryshme kohore, kanë përvetësuar shuma të konsiderueshme parash.
