Lulzim Basha deklaroi mbrëmë se reforma në drejtësi do të votohet në parim ditën e enjte. Basha tha se ka vetëm një kleçkë që duhet zgjidhur gjatë orëve të fundit.
Lideri demokrat pati një lidhje telefonike direkte me studion e emisionit “Opinion” ku një panel gazetarësh dhe analistësh diskutonin mbi reformën ku theksoi angazhimin e tij dhe të PD-së.
“Mbrëmë u ra dakord për të votuar variantin hibrid. Por për fat të keq u prish konsensusi në mesnatë pasi u fut një dispozitë poshtëruese, përjashtuese për shqiptarët që dëshirojnë të aplikojnë në organet e vetingut. Theksoj se ky është një propozim poshtërues sepse cënon normat dhe të drejtat e njeriut. Kam biseduar sot me përfaqësuesit më të lartë të SHBA dhe BE dhe kam besimin tim të patundur se një normë e tillë ligjore, e padenjtë do të hiqet. PD në emër të çdo shqiptari edhe të votuesve ka arritur një fitore për ta sjell draftin kushtetues këtu ku është sot me norma dhe standarde të bazuara në Komisionin e Venecias. Nuk duhet të kishte qenë një betejë por kështu e bëri kundërshtari ynë politik (Rama). PD do të votojë për miratimin në parim, por ky poshtërim do të bjerë se nuk ka rrugë tjetër. Ne do të vazhdojmë përpjekjet tona. Sovraniteti një përgjegjësi kushtetuese dhe llogari kushtetuese japin institucionet kombëtërare shqiptare. Të huajt kanë rol monitorimi. Kjo është një betejë e PD e fituar për kushtetuetshëmërinë”, tha Basha.
I pyetur nëse ka një marrëveshje me kreun e Kuvendit, Ilir Meta, Basha është përgjigjur negativisht.
“Asnjë marrëveshjen me Ilir Metën. Absolutisht asnjë”, ka deklaruar ai.
Kreu i opozitës theksoi se PD do ta votojë reformën të enjten. “Shqiptarët do të kenë të gjitha votat e PD për reformën”, u shpreh Basha.
