Pas largimit të Dritan Mehmetit, dibranët duket se janë të fiksuar pas këtij komuniteti dhe ia besojnë drejtimin e stolit Artan Mërgjyshit
Korabi, pas një sezoni të suksesshëm, por edhe të mbushur me kontradikta të brendshme, tashmë ka filluar ristrukturimin e skuadrës së re. Fillimisht po punohet për qetësimin e situatës, ku gjithkush do të ketë pozicione ekzakte, gjetjen e sponsorëve që do të përballojnë aktivitetin dhe që flitet se do të jenë dibranë të diasporës, si dhe përcaktimi i trajnerit që do të ndërtojë skuadrën. Pas negociatash të gjata, më në fund është vendosur që trajner i ri i ekipit nga Peshkopia do të jetë Artan Mërgjyshi, ish-futbollist i spikatur i Dinamos dhe sezonin që u mbyll trajner i Apolonisë së Fierit.
Ajo që bie në sy është, se dibranët janë të fiksuar pas çamëve, përsa i përket drejtimit teknik të skuadrës së tyre. Përpara Mërgjyshit, që tashmë ka misionin, të paktën për ta mbajtur Korabin në Kategorinë Superiore, në drejtimin e stolit ka qenë një tjetër çam, Dritan Mehmeti, i cili mes vështirësish të shumta e ngjiti skuadrën dibrane në elitën e futbollit të vendit. Edhe Mehmeti është produkt i shkollës dinamovite, madje edhe trajner i bluve përpara transferimit në Peshkopi.
