Në Shqipëri tregu privat i sigurisë ka shumë mbingarkesë. Aktualisht në vendin tonë operojnë rreth 250 kompani private të cilat ofrojnë shërbimin e sigurisë me 10 mijë punonjës. Rritja e numrit të këtyre kompanive ka bërë që cilësia e shërbimit të ulet ndjeshëm.
Bazuar në ngjarjen e Rinasit, ekspertët sugjerojnë qe institucionet e rëndësisë së veçantë të ruhen nga Policia e Shtetit dhe jo nga kompanitë e sigurive private.
Arjan Dyrmishi, ekspert: Kompanitë fitojnë tendera në mënyrë jo të ndershme dhe kjo ka sjellë një deformim të tregun. Po marrim rastin e Rinasit, nuk është se e ka fituar atë kontratë kompania më e suksesshme dhe duke qenë se nuk e ka fituar kompania më e suksesshme, sigurisht ndodhin këto gjëra. Ky sektor ka probleme të cilat meritojnë vëmendje më të madhe të institucioneve shtetërore. Janë disa ministri që kanë përgjegjësi për këtë, si Ministria e Financave, Ministria e Brendshme, Ministria e Punës.
Sipas ekspertëve sektori i sigurisë publike ka nevojë për ndërhyrje dhe rregullime strukturore që ai të funksionojë me efiçencë.
Dyrmishi: Ky sektor ka nevojë për ndërhyrje të forta dhe rregullime strukturore në mënyrë të tillë që të funksionojë më me efiçencë, funksionojë mbi bazë të konkurrencës së lirë dhe kjo konkurrencë e lirë të jetë ajo që të përcaktojë trajektoren e cilësisë së shërbimeve. Mos të jetë e përcaktuar mbrapa zyrave të disa njerëzve, të cilët marrin ryshfet, kalojnë paratë nën dorë dhe normal pastaj nuk ekziston asnjë mundësi verifikimi.
