Nga Arben Llalla
Eleni Dhimu është një vajzë deri diku simpatike, e hajthme, e cila drejton një organizatë tejet nacionaliste që quhet “Rinia e Vorio Epirit”. Për të është përfolur se ka një lidhje intime me një politikan jo pa rëndësi në Tiranë, por këto fjalë i përkasin rubrikës rozë.
Eleni Dhimu njihet për një aktivitet të ethshëm antishqiptar dhe aspiron aneksimin e jugut të Shqipërisë me parimin e vjetër, por ende popullor në qarqet nacionaliste greke, atë të Vorio Epirit.
Eleni, megjithatë është e dhënë pas dëfrimeve, nisur dhe nga mosha e re, ende premtuese. Në fotot e mëposhtme ajo shihet, tek zbavitet në një festë vorio-epirote me ligjvënësin e Kuvendit të Shqipërisë, Vangjel Dule. Ky farë shfrimi ka ardhur pas një fjalimi të mbajtur nga vetë kryetari i PBDNJ-së, i cili e ka ngritur vajzën peshë, gjë që duket në pasionin e saj për të hedhur vallen.
Dëshmitarët në këtë festë rrëfejnë që të dy kërcimtarët kishin sinergji me sho-shoqin dhe lëvizjet i koordinonin më së miri së bashku. Kjo sinergji ka vazhduar gjatë gjithë festës.
Vallja që kanë preferuar më së shumti ka qenë “Pogonishtja”, një valle shumë e njohur çame. Duket aneksimi i Epirit fillon me të kërcyer.
