Ambientalistët janë të ndarë në dy grupime kur bëhet fjalë për importin dhe riciklimin e mbetjeve në vendin tonë.
Ndërsa Nisma e deputetëve të maxhorancës për importin u kundërshtua nga një grup ekspertësh të mjedisit të cilët paralajmëruan edhe protesta, të tjerë specialistë janë pro projektligjit të importit të mbetjeve për riciklim, megjithëse kërkojnë forcim të standardeve për mënyrën e importimit. Diskutimi i projektligjit ka nisur në komisionin e Veprimtarive Prodhuese.
Xhemal Mato, ekspert mjedisi: Në asnjë mënyrë s’kemi qenë me idenë radikale që të ndalohet plotësisht ky ligj, por me mendimin që duke u përmirësuar kontrolli nëpër dogana.
Për opozitën është e pakuptueshme që maxhoranca ka risjellë këtë ligj pas kundërshtimit të fuqishëm që iu bë në 2011.
Helidon Bushati, deputet i PD: A duhet të ishte mirë që të fillonte diskutimi i këtij ligji me një mea culpa nga ana juaj zt. Kryetar si i majtë?
Mimoza Hajdarmataj, deputete: Akoma ne kemi një pamundësi për të ndarë që në origjinë mbetjet për t’i ricikluar sipas kategorive.
Deputeti Eduard Shalsi n shpjegoi ndërkohë ndryshimin e qëndrimit për sa i përket importit të mbetjeve.
Shalsi: Një tjetër problem në atë ishte çështja e mungesave të laboratorëve, të cilat mund të bënin analiza në kohë reale dhe me një saktësi. Një tjetër mungesë ishte ajo e specialistëve.
Projektligji për importin e mbetjeve pritet që të kalojë për miratim në parlament në seancën e fundit të parlamentit në 21 korrik.
