Florian Marku mbrojti këtë mbrëmje titullin kampion dhe foli fitimtar nga ringu. Përpara mikrofonit, Marku foli në shqip dhe falënderoi të gjithë mbështetësit e tij. Nuk harroi të uronte as besimtarët myslimanë për muajin e Ramazanit që ka nisur sot, më 2 prill.
“Faleminderit të gjithë shqiptarëve, ju dua shumë mbështetësit e mi, mos harroni, unë jam ende duke mësuar, por falë jush jam këtu ku jam. Dua t’ju uroj dhe Gëzuar Muajin e Ramazanit të gjithë myslimanëve që sot kanë nisur agjërimin”- tha Marku ndër të tjera.
Boksieri shqiptar u ndesh me uellsianin Kris Xhenkins, i cili kishte një rekord prej 24 fitoresh, 3 barazimesh dhe 4 humbjesh. Ndeshja e sotme ishte parashikuar që të kishte 10 raunde, por Markut i mjaftuan vetëm 4 prej tyre që ta mposhte britanikun me një knock out, duke mbrojtur kështu titullin e kampionit.
