Policia e Elbasanit ka vënë në pranga dy mjekë dhe një infermier për moskallëzim krimi lidhur me atentatin e djeshëm ndaj Nuredin Dumanit. Burime bëjnë me dije se ata kanë shkuar në banesën me qira të Dumanit për t’i mjekuar plagën dhe nuk e kanë denoncuar rastin në polici. Gjithashtu mësohet se në pranga ka rënë dhe një shtetase kosovare, që mendohet të jetë e dashura e Dumanit me të cilën kishte marrë shtëpinë në Fier.
Bujar Çela u vra në 19 shtator të vitit 2020 nga Nuredin Dumani rreth orës 05:45 të mëngjesit, ndërsa ishte duke pirë kafe në një lokal në fshatin Bradashesh në Elbasan. Media ka siguruar foton e momentit të vrasjes së vëllait të Talo Çelës, Bujar Çela, i ekzekutuar nga Nuredin Dumani, i cili u arrestua mbrëmjen e së martës.
Bujar Çela në atë kohë 62-vjeç punonte si taksist në të zezë. Vrasja e Bujar Çelës u bë nga Nuredin Dumani në një distancë të afërt, i cili kishte marrë urdhër për ta ekzekutuar nga Endrit Alibej. Që prej këtij momenti filloi dhe lufta e ashpër mes Dumanit dhe Talo Çelës të cilët dikur ishin miq të ngushtë, madje pjesë e një bande që grabitën dhe eurot në Rinas.
