Komiteti për Politikë të Jashtme të Parlamentit Evropian, ka miratuar propozimin për liberalizim e vizave për Kosovën.
Ulirike Lunaçek, raportuesja për Kosovën, në një postim në rrjetin social ‘Twitter’, ka njoftuar se Komiteti për Politikë të Jashtme i Parlamentit Evropian, ka miratuar propozimin për liberalizim të vizave për Kosovën.
Lunaçek ka shkruar se ndihet e lumtur për miratimin e propozimit për Kosovën nga Komiteti për Politikë të Jashtme i PE-së.
“Jam e bindur se qytetarët e Kosovës meritojnë heqjen e vizave sa më shpejt të jetë e mundur. Mungesa e perspektivës për të udhëtuar lirshëm vetëm për këtë pjesë të rajonit është e papranueshme dhe duhet të marrë fund. Tani gjithçka është në duart e politikanëve të Kosovës, ata duhet të ratifikojnë marrëveshjen e demarkacionit me Malin e Zi dhe shënojnë progres në ndëshkimin e rasteve të korrupsionit dhe krimit të organizuar”, deklaroi raportuesja për Kosovën në PE, Ulrike Lunaçek.
Votimi për heqjen e vizave kaloi me 38 vota pro, 7 kundër dhe 6 abstenim.
Komisioni i rekomandoi BE-së liberalizimin e vizave edhe për Ukrainën dhe Gjeorgjinë, përkatësisht me 42 vota pro, 3 kundër dhe 6 abstenim; dhe 43 vota pro, 5 kundër dhe 3 abstenim.
