Teuta është e vendosur të bëjë më të mirën, të kërkojë fitoren ndaj Kairat Almati. Futbollistët duket se janë në gjendje të mirë dhe përgatiten seriozisht për ndeshjen e rëndësishme.
Ndërkohë Presidenti Edmond Hasanbelliu do të akordojë një shifër prej 20 mijë eurosh në rast triumfi, ndërsa kjo shumë mund të rritet nëse skuadra kualifikohet në turin e dytë në 50 mije euro.
Ndërkohë trajneri i ri i Teutës Julian Ahmataj mendon se Teuta ka shanse të mira për të marrë një rezultat favorizues në ndeshjen e parë kundër Kairat Almati.
“Djemtë kanë më shumë se një muaj që stërviten dhe pres që të japin maksimumin në këtë ndeshje. Kundërshtarin e kam ndjekur në ndeshjen e fundit në kampionat kundër Astanës. Si çdo ekip edhe Kairati ka defektet e veta, por edhe cilësi e avantazhe ndaj kundërshtarëve. Lojtarët e tyre janë me eksperiencë, por djemtë e Teutës, edhe pse të rinj në moshë, kanë 2-3 vite që luajnë së bashku dhe nuk janë më rinj nga formimi futbollistik. Kemi grupin që kemi pasur vitin që shkoi, me disa ndryshime të vogla, por bërthama e ekipit është po i njëjti.”
