Një ngjarje shumë e rëndë ka ndodhur sot në Tiranë, ku një baba i dehur ka vrarë me thikë vajzën e tij 17-vjeçare dhe ka plagosur vajzën tjetër.
Ngjarja ka ndodhur në rrugën “Jordan Misja” në kryeqytet. Kujtim Ibraj ka plagosur me thikë dy vajzat e tij, E.I dhe Elidona Ibraj 17 vjeçe, e cila më pas nuk i mbijetoi dot plagëve dhe ndërroi jetë në spital.
Policia ka arrestuar autorin Kujtim Ibraj si dhe ka sekuestruar armën e krimit. Policia ka sqaruar se autori i krimit, Kujtim Ibra, ishte i divorcuar nga gruaja e tij, por ndanin të njëjtën shtëpi së bashku me 6 fëmijë, të cilët me vendim gjykate ishin nën kujdestarinë e të ëmës.
Policia sqaron se vrasja ka ndodhur pas debatit mes babit e të bijave. Sipas policisë, njëra nga vajzat ka tentuar të marrë policinë në telefon, por i ati e ka qëlluar me thikë. Më pas vajza tjetër ka ndërhyrë për të shpëtuar motrën e saj dhe ka mbetur e plagosur. Për pasojë njëra prej vajzave të familjes Ibraj ka ndërruar jetë në spital, duke shënuar nëj ngjarje shumë të rëndë.
