Ndërsa e gjithë vëmendja e shqiptarëve sot ishte përqëndruar tek mbërritja e kuqezinjve në Tiranë, një tjetër ekip ka prekur tokën mëmë pas një misioni të përmbushur me sukses.
Bëhet fjalë për kontingjentin e 3-të paqeruajtës, i cili kreu me sukses misionin ushtarak në Kabul, Afganistan, në kuadër të operacionit të NATO “Resolute Support Mission”.
Në ceremoninë e pritjes në mjediset ushtarake të aeroportit “Nënë Tereza” në Rinas ishin të pranishëm zëvendësministri i Mbrojtjes, z. Petro Koçi, shefi i Shtabit të Përgjithshëm të FA, gjeneralmajor Jeronim Bazo, komandanti i Forcës Tokësore, gjeneral brigade Nazmi Cahani, komandanti i Forcës Ajrore, gjeneral brigade Vladimir Avdiaj, zëvendësambasadori i Turqisë në Shqipëri, z. Sinan Cem Baş, drejtorë dhe ushtarakë të lartë të Ministrisë së Mbrojtjes dhe Shtabit të Përgjithshëm, si dhe familjarë e të afërm të ushtarakëve të kthyer nga misioni.
Zëvendësministri i Mbrojtjes,Petro Koçi pasi përshëndeti të gjithë të pranishmit u shpreh tepër i gëzuar në radhë të parë që ushtarakët ktheheshin shëndoshë e mirë nga një operacion i vështirë, ku ata kanë bashkëjetuar me rrezikun.
Koçi i krahasoi paqeruajtësit me djemtë e kombëtares, duke thënë se të dy palët janë mbrojtës të ndjenjës dhe të flamurit kombëtar. Në fund të fjalës së tij, zëvendësministri i Mbrojtjes, i shprehu falenderime të veçanta Forcave të Armatosura të Republikës së Turqisë:
Koçi:“Me këtë rast dua të falenderoj dhe t’i shpreh mirënjohjen Republikës së Turqisë, FA të Republikës turke për bashkëpunimin dhe bashkëveprimin, duke dhënë edhe një herë mesazhin se duke bashkëpunuar, duke qenë solidarë më njëri-tjetrin, ne mund të realizojmë detyrat dhe misionet, ne mund të jemi në gjendje që kapacitetet tona t’i shfrytëzojmë edhe më mirë për të eliminuar çdo gjenerator terrorizmi”.
Kontingjenti i tretë paqeruajtës në kuadër të operacionit të NATO Resolute Support Mission, përbëhej nga efektivë të Batalionit të tretë të Këmbësorisë (b3k), në Poshnje. Ata shërbyen me profesionalizëm dhe disiplinë të lartë për një periudhë 6 – mujore në Kabul, Afganistan.
Kontigjentet që Shqipëria po dërgon në kuadër të RSM janë vazhdimësi e kontributit që Forcat e Armatosura shqiptare japin me trupa paqeruajtëse në kuadër të angazhimit të Aleancës së Atlantikut të Veriut në luftën kundër terrorizmit në Afganistan.
