Ristani: Partia Demokratike nuk bëhet pengesë e asnjë hetimi ndaj zyrtarëve apo ish-zyrtarëve të saj dhe e vlerëson luftën ndaj korrupsionit si jetike për vendin
Partia demokratike ka deklaruar mbështetjen për hetimin ndaj ish-ministrit të qeverisë Berisha, Spiro Ksera. Sekretari i Përgjithshëm i PD-së, Arben Ristani, tha në një deklaratë për mediat se Partia Demokratike mbështet dhe inkurajon çdo hetim dhe akt të drejtësisë në luftën kundër korrupsionit.
Ristani theksoi se Partia Demokratike nuk bëhet pengesë e asnjë hetimi ndaj zyrtarëve apo ish-zyrtarëve të saj në asnjë rast dhe e vlerëson luftën ndaj korrupsionit si jetike për vendin. PD i kërkoi prokurorisë të kryej hetimet me profesionalizëm.
“Në lidhje me ndalimin e z. Ksera PD i kërkon Prokurorisë të zbardhë akuzat dhe të veprojë me profesionalizëm duke zbatuar ligjin dhe vetëm ligjin. Ne inkurajojmë hetime të drejta dhe objektive, të pandikuara nga politika dhe veçanërisht nga nevoja që ka qeveria dhe kryeministri më i korruptuar në Ballkan, për të larguar vëmendjen nga hajdutëria masive që po bëjnë çdo ditë, në dogana, tatime, tendera, koncesione dhe privatizime”, tha Ristani.
