Kreu i ALUIZNI-t, Artan Lame bëri të ditur se ndryshimet administrative i kanë hapur rrugën legalizimit në fshatra. Ky proces ka filluar me shpërndarjen së lejeve në zonën e Dajtit, ku që nga viti 2005 deri tani nuk ishte përfunduar asnjë procedurë legalizimi.
Sipas tij, pengesë për nisjen e procesit ka qenë jo vetëm miratimi i planeve rregulluese. Në fjalën e tij në takim me banorët e Bërzhitë, Lame tha se edhe ish-komunat do të jenë në fokus të punës së ALUIZNI-t.
Një tjerët problem që mbetur për t’u zgjidhur janë vonesat që vijnë nga zyrat e Hipotekave për procedurat që ndiqen, nga dorëzimi i lejes deri në pajisen me tapi të qytetarëve.
“Kemi të bëjmë me procesin e legalizimit të disa prej ish-komunave të Tiranës. E rëndësishme është mbyllja e këtij procesi për shumicën prej jush. Znj.ministre, Eglantina Gjermeni, kjo zonë është nga ato që kanë vuajtur më shumë për të marrë legalizimin. Nëse në qytet e merrnin me ndonjë lek, legalizim në komuna nuk është bërë asnjë. Këtu nisi çdo gjë nga e para nga punonjësit tanë. Nga viti 2005 deri tani s’është dhënë asnjë leje, sot jepet grupi i parë i legalizimeve. Pengesat dhe zvarritjet nga një zyrë në tjetrën, nga një agjenci në tjetrën kanë lënë peng procesin. Qytetarët nuk duan të dinë për këtë gjë por duan të dinë për dosjen. Planet në shumë zona mirëfillti rurale fshatare kanë parashikuar ndërtime të larta që kanë bllokuar legalizimin. Mbetet detyra jonë me Bashkinë Tiranë dhe me administratorët e njësive ta zgjidhim këtë problem. Jemi të fokusuar për ta zgjidhur. Do kujtoja takimin e së hënës në Kryeministri për këtë problem. Problem tjetër për komunat mbetet hipoteka, një problem i trashëguar prej 10-15 vjetësh. Me gjithë punën e bërë, ka shumë punë për të bërë, për të zgjidhur. Probleme të tjera janë ato brenda administratës. Thuajuni të tjerëve, të afërmve tuaj ‘unë e mora lejen, shko dhe ti plotëso dokumentacionin për të përfituar legalizimin’”, – tha Lame në fjalën e tij.
Legalizimet
Përfundimi i legalizimit të 200 zonave informale të identifikuara në Shqipëri, si dhe komunikimi profesional dhe i përhershëm me qytetarët janë prioritet për të sotmen dhe të ardhmen e Ministrisë së Zhvillimit Urban dhe 18 zyrave rajonale të ALUIZNI-t. Legalizimi dhe urbanizimi i zonave informale janë dy procese të cilat do të vijojnë të ecin paralelisht, si një risi në procesin e ndërhyrjes në territor dhe në kulturën ndaj zhvillimit të qendrave urbane.
Regjistrimi në Hipotekë
Pak kohë më parë, Këshilli i Ministrave ka miratuar një vendim sipas të cilit ALUIZNI do të ketë një bashkëpunim me Hipotekën për të bërë të mundur marrjen më shpejt të certifikatës së pronësisë. Ky bashkëpunim nuk zhvesh nga kompetencat Zyrën e Regjistrimit të Pasurisë.
Deri para vendimit, ALUIZNI mbyllte vetëm dhënien e lejes së legalizimit, dhe kjo leje i jepej qytetarit për të aplikuar në Hipotekë për të marrë certifikatën e pronësisë. Me sistemin e ri që u miratua, edhe kjo pjesë e procesit ndiqet nga ALUIZNI, i cili aplikon në Zyrën e Regjistrimit të Pasurive. Pra qytetari merr një kopje të lejes së legalizimit dhe gjithë procedura vijuese për regjistrimin në ZRPP bëhet nga ALUIZNI
