Lidhur me dosjen e “Toyota Yaris”, një grup prokurorësh nga Belgjika kanë ardhur në Tiranë për të bashkëpunuar me autoritetet shqiptare.
Prokurorët belgë do të marrin në pyetje kryetarin e Partisë Demokratike, Lulzim Basha në lidhje me këtë çështje, pasi ishte personi që denoncoi në mes të Kuvendit se 5 milionë euro ishin nisur nga Gjermania drejt Shqipërisë. Megjithatë, nuk dihen ende nëse se kur do të mund të merret Basha në pyetje.
Kjo lëvizje e prokurorëve belgë, vjen thuajse katër vite pasi u sekuestruan 3 milionë e 470 mijë euro në Portin e Durrësit. Aktualisht prokurorët dhe oficerët belgë ndodhen në Prokurorinë e Tiranës, ndërsa dje kanë qenë në zyrat e Prokurorisë së Posaçme kundër Korrupsionit dhe Krimit të Organizuar (SPAK).
Kjo çështje është bërë si fillim publike nga Basha, i cili akuzoi Taulant Ballën si të përfshirë në marrjen e miliona eurove. Basha tha se në vendin tonë do të vinin 5 milionë euro, por në fakt në Portin e Durrësit u numëruan vetëm 3 milionë e 470 mijë euro. Deklarata e Bashës ndryshoi itinerarin pasi makinat që supozoheshin të niseshin nga porti Ankonës, devijuan rrugën dhe u nisën nga porti i Barit drejt Durrësit.
Balla e fitoi edhe gjyqin ndaj Bashës, i cili u gjobit me 50 mijë lekë gjobë për shpifje. Fillimisht për këtë dosje u arrestuan gjashtë persona, por të gjithë u liruan përveç Elvis Vladit dhe shoferit të kamionit Agim Ceka.
