Pacientëve të Vlorës që kanë nevojë për hemodializën nuk do t’ju duhet të udhëtojnë më drejt Tiranës apo Fierit, pasi në spitalin rajonal të këtij qyteti është ngritur Qendra e re e Hemodializës.
Qendrën e vizitoi kryeministri Rama, i cili nënvizoi se ky shërbim u arrit falë partneritetit të suksesshëm publik-privat.
Edi Rama: “Kjo është prova e prekshme e të vërtetë, që ajo që bota e bën rregullisht dhe e bën rutinë sot, partneritetin publik-privat në shërbimin shëndetësor dhe që këtu është kriminalizuar, sikur po bëhet një hata e madhe, faktikisht rezultatet ja ku janë. Në atë lloj sistemi paguheshin nga shteti 90 euro dhe merrej një shërbim mizerabël. Në këtë skemë, shteti paguan vetëm 80 euro dhe merr shërbim që është standarde europiane, të certifikuar si kudo.”
Kjo qendër është ndër 5 qendrat që hapen në vend gjatë këtij viti, çka do të ulë ndjeshëm edhe shpenzimet e transportit që paguheshin nga spitali për këta pacientë.
Edhe shpërndarja e barnave do të bëhet nga kjo qendër me listën e re të rimbursimit dhe nuk ka më nevojë që pacientët të vijnë në Tiranë.
