Dy avokatët VIP që kanë qenë prokurorë të përgjithshëm, përballë pasardhësit të tyre në gjyqin për Çakon e Rroshin
Gjykata ka dhënë sot dy vendime, të cilat kanë impakt të rëndësishëm në situatën politike në vend. Maksim Haxhia dhe Theodhori Sollaku, fituan sot betejën me prokurorinë e drejtuar nga Adriatik Llalla në dy çështje që kanë shkaktuar tonditje në situatën aktuale politike. Maksim Haxhia ia doli sot të kthejë në detyrë klientin e tij, drejtorin e Policisë së Shtetit, Haki Çako, i cili ishte pezulluar nga detyra me kërkesë të Prokurorisë lidhur me skandalin e përgjimeve. Ndërsa Theodhori Sollaku ia doli të ulë masën e sigurisë për klientin e tij, kryebashkiakun e shumëpërfolur soicialist, Elvis Roshi duke e liruar nga burgu, në një masë më të ulët sigurie, në “arrest shtëpie”.
Këta dy avokatë të famshëm, Maksim Haxhia dhe Theodhori Sollaku, janë sa pjesë e këtij sistemi të drejtësisë në Shqipëri, aq edhe “viktima” të tij. Maksim Haxhia ka qënë Prokuror i Përgjithshëm në vitet e para të pluralizimit. Ai u zgjodh në këtë post në qeverisjen e parë të PD-së, dhe u shkarkua po nga ajo shumicë pak muaj pasi u zgjodh.
Theodhori Sollaku është zgjedhur Prokuror i Përgjithshëm pak vite para se të vinte në pushtet PD, në vitin 2002 në një atmosferë konsensusi mes PD-së së drejtuar nga Sali Berisha në opozitë dhe PS-së drejtuar nga Fatos Nano në qeverisje. Pra, Sollaku ishte produkt i konsensusit mes palëve, pasi ishte shkarkuar nga kjo detyrë Arben Rakipi, për shkak të aleancave fluide mes opozitës dhe një pjesë të mazhorancës së majtë.
Maks Haxhia dhe Theodhori Sollaku, që mbrojnë klientë të rëndësishëm. Për shenbull, Maksim Haxhia ka mbrojtur dhe ia ka dalë ta nxjerrë krejt të pastër, ish-guvernatorin e Bankës së Shqipërisë, i cili u arrestua po me kaq bujë sa Çako, dy vjet më parë.
Ndërsa Theodhori Sollaku, ka mbrojtur pak muaj më parë pronarin e medias “Agon Channel”, Françesko Beketi. Ndërsa aktualisht është avokat i kryebashkiakut të shumëpërfolur të Kavajës, i cili akuzohet nga opozita për të shkuar kriminale.
Ata kanë qenë drejtues të lartë në sistem si prokurorë, e më pas janë konvertuar në avokatë me peshë specifike në çështje nga më të rëndësishmet që kanë prekur e ndikuar zhvillimet poltike.
Qysh në vjeshtën e vitit 1992, Maksim Haxhia e kishte parashikuar se cili do të ishte sisemi i drejtësisë në Shqipërinë e tranzicionit. Me sa duket kishte vendosur herët të bëjë një pakt, për të mbijetuar në këtë sistem drejtësie nga i cili s’kanë shpëtuar pa u përlyer as politikanë e as juristë me famë në këto 25 vite.
Ja çfarë thoshte Maksim Haxhia në vitin 1992, kur po hidheshin themelet e para të sistemit gjyqësor që kemi sot: “Dëshiroj të bëj të ditur përpara këtij Parlamenti, Presidentit dhe opinionit tonë publik, qëndrimin tim të prerë kundër mendimit regresiv e të paprecedent në asnjë shtet demokratik të zhvilluar për krijimin e të ashtuquajturave kurse disamujore për përgatitjen e juristëve. Pranimi i kësaj do të thotë që të përdhunohet drejtësia dhe me vetëdije të çohet shoqëria në anarki ajo që të çon në shkeljen e të drejtave dhe lirive të shtetasve. Kam vënë në dispozicion përkushtimin tim, ndershmërinë time dhe aftësitë e mia, për çështjen e madhe e të shenjtë të drejtësisë, të cilën do ta mbroj deri në fund me të gjitha forcat e mija nga çdo shkelje dhe nga kushdo qoftë”, pati deklaruar Maksim Haxhia, kur u shkarkua nga Kuvendi i Shqipërisë i dominuar në shumicë nga Partia Demokratike, në vjeshtën e vitit 1992.
Ndoshta sot Haxhia e ka një bilanc, nëse e ka fituar bastin, sidomos në raport me premtimin e tij solemn: “Çështjen e madhe e të shenjtë të drejtësisë, do ta mbroj deri në fund me të gjitha forcat e mia nga çdo shkelje dhe nga kushdo qoftë.”
