3 të rinj kanë rënë sot në prangat e policisë, pasi mbanin peng prej disa ditësh 30 emigrantë. Bëhet me dije se këtë mëngjes policia ka finalizuar operacionin “Just in time”, për goditjen e veprimtarisë kriminale të dhënies ndihmë shtetasve të huaj, për kalim të paligjshëm të kufirit. Në këtë kuadër janë kapur në flagrancë 3 shtetas që mbanin në banesë emigrantët e paligjshëm.
Bëhet me dije se, janë arrestuar M. K., 40 vjeç, banues në Tiranë, M. E., 26 vjeç, banues në Tarablos, Libi, dhe Z. D., 27 vjeç, banues në Casablanca, Marok. Sipas të dhënave, në banesën e shtetasit M. K., në katin e parë, të tretë dhe te katërt, shërbimet e Policisë kanë gjetur rreth 30 persona të shtetësive të ndryshme, kryesisht nga Lindja e Mesme, të cilët mbaheshin në këto dhoma, pa u lejuar të dilnin, duke ju marrë mjetet e komunikimit dhe duke i kërcënuar familjarët në vendet e origjinës, për kryerjen e pagesës së transportit të këtyre shtetasve, drejt vendit tonë.
Në vijim të veprimeve u proceduan penalisht dhe 14 shtetasit e huaj, për veprën penale “Kalim i paligjshëm i kufirit shtetëror”. Ndërkohë, policia po vazhdon hetimet për të zbardhur rrjetin e trafikut ku dyshohet se janë përfshirë tre të arrestuarit.
