Ditët e fundvitit të kaluar përkuan me lajmin brenda salloneve të purove në mazhorancë që Rama e kishte lëshuar Engjëllin e tij të kaq viteve si njeriu kyç në të gjithë “kuzhinën” e qeverisë dhe të vendimeve që duhet të shkonin aty.
Me, apo pa prezencën e shefit të madh. Sepse dikush duhet të firmoste, sikundër Peleshi dikur firmosi 17 projekt-vendime të stilit Agaçi për skandalin e inceneratorëve.
E megjithatë duket që ka një pendesë të qëllimshme, apo një mekanizëm të stilit allajsoj që Rama ka frenuar një vendimmarrje të tillë, teksa kjo ka shërbyer vetëm për një fasadë propagande e spostim vëmendje të atij grup interesi që godisnin pikërisht lëvizjet e Agaçit.
Taktika ishte gol, por me sistem VAR. Difuzioni me stil i Ramës, gjithsesi e ka një hall brenda, një hall të madh, sepse Engjëlli i Ramsit është koka inceneratore dhe gjithçka ka prodhuar kabineti Rama me ardhjen në pushtet.
Rama vijon ta lëshojë në një kohë që e ka dorëzuar në heshtje, si për t’i thënë: S’më lënë të të mbaj, por dua të mos ikësh…!
E megjithatë, Agaçi është larguar, ose Rama ka qenë i detyruar ta largojë për pak ditë në çoroditjen e ambientit politik, por duke e mbajtur ende afër, sepse vetë ai, avokati, di shumë, përveçse vetë ka bllofuar po kaq shumë në disa nisma pikante, kryesisht dhe vetëm në dy:
1. Çështja Beketi dhe arroganca e tij për mospërfaqësim të shtetit shqiptar në Arbitrazh me dijeni të Agaçit;
Dhe 2. Kauza e prodhimit të dokumentacioneve ligjore, lidhur me vendimet qeveritare për kauzën më të rëndë të Inceneratorëve. Vorbulla afër tij, duke pasur një karton të verdhë më parë në kohën e arrogancës mbi arbitrazhin për Beketin, tashmë me inceneratorët ka shtuar zullumin dhe nuhatjen e drejtësisë, teksa në mes gjendet Rama që po mban me frena dore, një situatë në oborrin e tij, duke tentuar të luajë me dy porta rreth çështjes Agaçi.
Praktikisht e ka larguar, por stepet shumë për ta njoftuar.
Sepse, vetë ai thjesht me një shikim të drejtpërdrejtë i tërbon memorien dhe i trondit terezinë ditore, që s’ka Erdogan t’ia sjellë në vete. E megjithatë, gojët e liga dhe kontingjentet e helmeve në Kryeministri, por edhe jashtë saj tregojnë që Agaçi po lëshohet pak nga pak nga Rama drejt e në gojën e drejtësisë, për të gjitha orkestrimet e tij në afera, për të cilat nuk funksionon asnjë lobim politik, qoftë edhe kryeministror të ndikojë. Rama e di fare mirë që koha e Agaçit ka përfunduar, por sa herë mendon këtë konstatim, njëherësh i kujtohet vetja, pasi afera e tij, kalonte nëpërmjet avokatit, që në fund të gjithçkaje mbetet një rrezik potencial për të marrë nofkën “pentito”.
