Ministri i Jashtëm i Gjermanisë, Frank-Walter Steinmeier ndodhet sot në Tiranë për në vizitë zyrtare. Kryediplomati gjerman do të qëndrojë vetëm 6 orë në kryeqytetin shqiptar dhe axhenda e tij parashikon vetëm tre takime, me kryediplomatin Bushati, kryeministrin Rama dhe kreun e opozitës Basha. Temë kryesore e takimit pritet të jenë bashkëpunimi bilateral Shqipëri-Gjermani, zhvillimet në rajon por edhe reforma në drejtësi.
BUSHATI: REFORMA NË DREJTËSI, PËR TU NDARË NGA EPOKA E TRANZICIONIT. Në konferencën e përbashkët me kryediplomatin gjerman Frank-Walter Steinmeier, ministri Ditmir Bushati theksoi rëndësinë e miratimit të reformës në drejtësi, që sipas tij synon ndarjen përfundimtare me epokën e tranzicionit. Sipas Bushatit, sistemi i sotëm i drejtësisë në vend është një përzierje e korrupsionit me padrejtësinë. Ndër të tjera, kryediplomati shqiptar theksoi se Shqipëria mbetet një partner i besueshëm në luftën kundër terrorizmit dhe ekstremizmit. Bushati bëri edhe një batutë lidhur me golin e shqiptarit Shkodran Musafi, i cili luan me kombëtaren gjermane, duke thënë: Ditët e fundit kemi dëshmuar se mund të kontibuojmë edhe me gola.
RAMA
Kryeministri Edi Rama ka përshëndetur vizitën e Ministrit të Jashtëm gjerman, duke thënë se ai është një mik i madh dhe mbështetës për hapjen e negociatave. “Mikpresim sot një mik të madh, Ministrin e Jashtëm Gjerman, Frank Walter Steinmeier, mbështetës i madh i Shqipërisë për hapjen e negociatave”, shkruan Rama në facebook.
TAKIMET
Temë kryesore e takimit pritet të jenë bashkëpunimi bilateral Shqipëri-Gjermani, zhvillimet në rajon por edhe reforma në drejtësi. Më pas ministri i Jashtëm gjerman do të takohet në selinë e qeverisë me kryeministrin, Edi Rama si edhe mandej do të niset drejt selisë blu, ku do të zhvillojë një bashkëbisedim me kreun e PD-së, Lulzim Basha. Kjo është është hera e parë që Shtajmajer vjen në Tiranë dhe vizita e tij ndodh në një kohë kur politika ende nuk ka gjetur konsensusin për miratimin e reformës në drejtësi. Zyra e kancelares gjermane Angela Merkel u angazhua drejtpërdrejt pak ditë më parë për gjetjen e një konsensusi mes palëve për “drejtësinë” dhe u bë e ditur se lideri i opozitës shqiptare, Basha pati edhe një telefonatë nga Berlini zyrtar pak orë para takimit me kryeministrin Rama. Një fakt të tillë Basha e pohoi edhe në mbledhjen e grupit parlamentar të thirrur pas takimit me shefin e qeverisë, ku ndër të tjera deklaroi se “formulën e vendeve të rezervuara e ka propozuar vetë eksperti i OPDAT-it në nëntor. Ne kemi qenë të qartë në këtë proces, ne kemi kërkuar konsensus. Si Nuland, edhe këshilltari i Merkel me të cilin fola në tel janë të qartë. Këtë formulë e ka propozuar Rama, e ka konfirmuar ‘Venecia’, dhe ne po kërkojmë atë për të cilën është rënë dakord”, – u shpreh Basha
