Inspektorati i Lartë i Drejtësisë ka pranuar kërkesën e gjyqtares së Elbasanit, Enkeleda Kapedani, për arritjen e një marrëveshjeje, ku pranonte shkeljen në këmbim të një mase disiplinore më të butë.
Mësohet se, Kapedani ka pranuar shkeljen disiplinore dhe ka shprehur pendesë për veprimet e saj brenda institucionit të gjykatës, ndërsa periudha e pezullimit i ka shërbyer për të reflektuar rreth situatës duke e bërë më të kujdesshme.
ILD thotë se vendosi të pranojë marrëveshjen bazuar në rrethanat e reja të krijuara: “Magjistratja ndryshe nga qëndrimi mohues lidhur me shkeljen disiplinore gjatë procedimit fillestar disiplinor ka marrë përsipër peshën e përgjegjësisë morale, ka kërkuar ndjesë, si dhe ka shfaqur pendesë lidhur me aktet e kryera nga ana e saj. Magjistratja ka deklaruar se periudha e pezullimit deri më sot i ka shërbyer për të reflektuar thellë rreth situatës dhe të ndjejë një peshë përgjegjësie dhe përgjegjshmërie për atë çfarë ka ndodhur, duke e bërë më të kujdesshme në jetën e saj private”, thotë mes të tjerash ILD.
ILD dhe magjistratja u dakordësuan për nënshkrimin e marrëveshjes së përbashkët të pranimit, për caktimin ndaj magjistrates të masës disiplinore “Pezullim” me të drejtën për të marrë pagën minimale për një periudhë kohore për 6 muaj”
Kujtojmë se Enkeleda Kapedani pushtoi rrjetet sociale, pas publikimit të disa videove që ajo hidhte në Tik Tok, ndërsa sfilonte në zyrën e saj shoqëruar me muzikë të papërshtatshme për imazhin e një magjistrati./ D.L
