Gjykata e Tiranës ka vendosur të lirojë nga burgu 34 të arrestuarit që u arrestuan pas protestës së dhunshme të thirrur nga ish-kryeministri Sali Berisha në selinë e PD. Prokurori i çështjes deklaroi në sallë se brenda selisë së PD-së, nuk ishte gjetur asnjë gjë e paligjshme.
Mësohet se, është caktuar masa e sigurisë “detyrim paraqitje” për 28 prej të arrestuarve, ndërsa 6 të tjerët po hetohen në gjendje të lirë. 6 personat të cilët do të hetohen në gjendje të lirë janë mbështetësit e kryedemokratit Basha.
Këta persona akuzoheshin për vepra penale të ndryshme si “Shkatërrim prone”, “Prishja e qetësisë publike”, “Shkelja e rregullave mbi lëndët plasëse, djegëse dhe radioaktive”, “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi, mbajtja, blerja apo shitja pa leje e armëve të ftohta”, por gjykata vendosi t’i lërë të lirë.
