Ndërsa komentoi zhvillet e fundit në selinë e PD, kryeministri Edi Rama u pyet ndër të tjera edhe nëse sheh një mundësi bashkëpunimi me opozitën në këtë situatë ku ndodhet.
Rama nuk i kurseu ironitë ku tha se kjo mbetet për t’u parë pasi “nuk dihet më se kush është kush”, megjithatë shtoi se për sa kohë deputetet demokratë janë legjitimë, mundësitë mund të krijohen.
“Të dy këta përfaqësues të mbetur nga e shkuara në këmbë, nuk kanë asnjë legjitimitet veç e veç. Deputetët e PD, janë legjitimë sepse janë aty me votën e popullit. Kur shohim që ka shans për bashkëpunim, jemi aty për ta bërë këtë. Situata është e vështirë për momentin, do të shohim si do të zhvillohet. Uroj që të ketë një zgjidhje paqësore. Uroj që dhuna dhe fortifikimet të mbeten pas”, tha Rama.
Ndryshimet në selinë blu, kanë ndikuar edhe në kampin tjetër opozitar, pasi Partia Socialiste do të mbledhë Kongresin më datë 29 Janar, ku do të miratohen disa ndryshime statutore.
