Pas mbledhjes me kryesinë e PS, kryeministri Edi Rama ka dhënë një deklaratë për mediat, ku ka komentuar ndër të tjera edhe zhvillimet intensive në PD.
“Për të qeshur dhe për të qarë” i cilësoi kryeministri shkarkimet dhe përjashtimet në PD, ndërsa Bashën dhe Berishën i quajti sërish dy “kufoma politike”. Sipas tij, të dy kanë marrë peng demokratët dhe nuk e lëshojnë njëri-tjetrin.
“Patjetër, patjetër, nejse kjo është për të qarë dhe për të qeshur, unë nuk mund të qaj gjithë kohës për ta, mund edhe të qeshim ndonjëherë. Nuk më rezulton se ka pasur anëtarë të Kryesisë që të marrin godinën me dhunë, ne jemi bashkë për interes të njerëzve, dhe jo për interesa vetjake siç janë dy kufomat politike të PD-së. Është një kacafytje që po ra njëri, bie dhe tjetri. Në të gjitha familjet dhe organizatat nuk janë të zgjidhura të gjitha problemet, ajo që është pak por e sigurt është që PS është në funksion të zgjidhjes së problemeve të njerëzve dhe të vendit, ndërsa PD në funksion të problemeve të pazgjidhshme të dy kufomave politike, njëri me seli tjetri pa seli. Njëri i kyçur në seli, dhe tjetri i kyçur në listën e zezë”, tha Rama.
Sipas kryeministrit, dhuna në PD mund të ishte shmangur nëse dyert nuk do të fortifikoheshin.
