Mediat britanike kanë publikuar detaje të reja në lidhje me zhdukjen e 42-vjeçarit shqiptar Ali Qazimaj, i cili dyshohet se është autori i vrasjës së një 75-vjeçari britanik dhe zhdukjes së bashkëshortes së tij.
“The Sun” shkruan se kërkimet për shqiptarin tani janë zhvendosur edhe në Shqipëri, pas dëshmive të reja që policia britanike ka marrë.
42-vjeçari Qazimaj ka përfituar pasaportë britanike me identitet fals si kosovar, me pretendimin se është larguar nga lufta në Kosovë.
Gazeta ka zbuluar një letër me një numër telefonik shqiptar të përdorur prej tij dhe ku ishin shënuar disa të dhëna për tokën që ai kishte blerë në Rinas, pranë aeroportit. Këto të dhëna i janë dërguar policisë shqiptare, e cila ka nisur bashkëpunimin me britanikët.
“The Sun” shkruan se një burim i lartë i policisë në Shqipëri tha: “Ne ju falënderojmë për bashkëpunimin tuaj. Kjo do të jetë një ndihmë e çmuar për hetimet tona. Ne do të punojmë sa më shumë që mundemi për të ndihmuar policinë britanike. Ne besojmë fuqimisht se ky njeri nuk është Kosovar, por Shqiptar dhe ai ka lidhje me Shqipërinë.”
