Gazetari Klodian Tomorri ka ndarë disa detaje nga tenderi i hapur i ARRSH për zgjerimin e rrugës që lidh Aeroportin e Vlorës me Autostradën Fier-Vlorë. Me anë të një postimi të bërë në facebook, gazetari shkruan se janë skualifikuar 10 ofertat më të ulëta dhe ia kanë dhënë tenderin kompanisë së 11-të, asaj Fusha. Sipas gazetarit diferenca është 600 mijë euro.
Tomorri shton se kompanitë nuk kanë patur të kontraktuar ose të punësuar një ekspert për dhënien e ndihmës së parë, duke shtuar se në kantier duhet një infermier për ndihmën e parë që do të paguhet 600 mijë euro për 14 muaj.
Shkrimi:
Një tjetër tender i shkëlqyer në infrastrukturë Ka bërë një tender ARRSH për zgjerimin e rrugës që lidh Aeroportin e Vlorës me Autostradën Fier-Vlorë. Fondi limit 2.2 milionë euro. Ajo që ka ndodhur aty është një monument i pisllëkut buxhetor. Kanë skualifikuar 10 ofertat më të ulëta dhe ia kanë dhënë tenderin kompanisë së 11-të. Kush ishte kompania e 11-të? Fusha. Diferenca nga oferta më ulët tek oferta fituese është plot 600 mijë euro.
Statistikisht, probabliteti që 10 oferta rresht të mos jenë në rregull me kriteret e tenderit është zero. Thjesht është e pamundur të ndodhë. Por si e kanë justifikuar? Kollaj fare.
Të dhjetë ofertat janë skualifikuar thuajse me të njëjtin sebep. Kompanitë nuk kanë patur të kontraktuar ose të punësuar një ekspert për dhënien e ndihmës së parë. Domethënë duhej një infermier me kutinë e ndihmës së shpejtë në kantier.
Kriteret e tenderave të këtyre janë vepër arti. A thua se nuk i kërkohet dot kompanisë, që ka paraqitur ofertën më të mirë te pajtoje një ekspert të ndihmës së shpejtë pasi është zhvilluar tenderi. Institucionet e huaja, USAID-i, BE etj etj kështu veprojnë kur bëjnë tendera. Kurse këta tanët jo. Sepse këta nuk kanë qëllim të mbrojnë taksapaguesin dhe ta cojnë garën tek oferta më e mirë për buxhetin. Qëllimi i këtyre është që të përdorin kriteret për ta cuar tenderin aty ku duan. Si përfundim, këtë infermierin e Fushës, që do të vije rrotull kantierit të rrugës me kutinë e ndihmës së shpejtë në dorë do ta paguajmë 600 mijë euro ne për vetëm 14 muaj. Njësoj si CEO-n e Goldman Sachs-it.
