Mbledhja e Komisionit Hetimor për zgjedhjet e 25 prillit, ka nisur me diskutime për rendin e ditës dhe rregulloren .
Kreu i Komisionit Enkelejd Alibeaj, ka prezantuar rendin e ditës së sotme, ndërsa u shpreh se ky takim është vazhdim i ezaurimit të mbledhjes së parë, për të diskutuar për shqyrtimin e miratimit të rregullores si edhe zgjedhja e sekretarit.
Nënkryetari i Komisionit Parlamentar, Toni Gogu kërkoi që të miratohet në parim rregullorja dhe të votohet rendi i ditës, kërkesë e cila u kundërshtua.
Bardhi: Nuk votohet rendi i ditës në Komision.
Bylykbashi: Një kërkesë e tillë është pa vend, aq më tepër edhe përcaktimi i mbledhjes së Komisionit.
Bushka: Nuk po bëjmë një kërkesë për të hedhur në votim rendin e ditës, por duke qenë se këtu nuk është respektuar këshillimi mes kryetarit dhe nënkryetarit, për ta vënë në shina në përputhje me rregulloren ligjore. Për ne nuk ka problem.
Alibeaj: Rendi i ditës është vazhdim i ezaurimit të mbledhjes së parë. Rendi i ditës kishte 7 pika, nga të cilat kemi ezauruar 4 të parat dhe kanë mbetur edhe 3 të fundit.
Gjatë fjalës së tij deputeti i PD-së Ervin Salianji, tha se disa prej propozimeve cenojnë veprimtarinë e Komisionit pasi bien ndesh me ligjin.
“Siç u dakordësuam me kërkesën e parë të PS, ne duhet të vinim me një produkt të përcaktuar në lidhje me ndryshimet e propozuara. Ka pasur disa propozime që bien ndesh me etikën”, tha ai.
Alibeaj: Kuptova se ju nuk keni gjetur gjuhën e përbashkët.
Salianji: Të votojmë në parim rregulloren e propozuar nga kryetari
Diskutimi ka vijuar më tej mes palëve, ndërsa nga ana e tij, Gogu theksoi se në këtë mbledhje kryetari i Komisionit Alibeaj, po kërkon të humbë kohën dhe se sipas tij qytetarët duan që hetimet të nisin sa më parë.
Ndërkohë Alibeja theksoi se që nga nisja e takimit ka respektuar pikë për pikë rregulloren dhe se nuk ka ndërmend t’i kufizojë fjalën askujt në këtë mbledhje.
Gogu: Në cilësinë e zëvendës kryetarit detyrohen për shkak se vazhdoni që të uzurponi të drejtën e Komisionin për të vendosur rendin e ditës dhe ecurinë e kësaj mbledhje. Po shpërndani kohën dhe kemi humbur 30 minuta nga propozimi i bërë për të hedhur në votim rregulloren. Duam t’i hapim rrugë hetimit, ju vazhdoni që të mos hidhni në votim propozimet tona…Nëse kjo është mbledhja e parë dhe në mënyrë flagrante shpërndani kohën. Zoti Saliaji luan rolin e relatorit të rregullores së keni propozuar. Kryetar ju ftoj pa humbur kohë të zbatoni ligjin, qytetarët po presin hetimin e zgjedhjeve që ju po i bëni pis pa nisur ende hetimi.
Alibeaj: Ne kemi të gjithë vullnetin për ta bërë hetimin e kërkuar nga ne. Kjo nuk do të thotë që unë të mos respektoj rregulloren se si do të bëhet mbledhja. Nuk kam ndërmend t’i kufizoj të drejtën e fjalës askujt. Kërkuat fjalën ua dhashë.
