Ikja e ikonës së gazetarisë sportive, Kosta Grillo ka shkaktuar një dhimbje të madhe te familjarët, miqtë dhe të gjithë ata persona, të cilët kishin bashkëpunuar qoftë një herë të vetme me të.
Së fundmi, e motra e gazetarit, Ani Grillo, përmes një postimi në rrjetet sociale kujton 55 ditët e torturës në shtratin e spitalit. Ajo rrëfen se si çdo ditë i jepte kurajo dhe forcë gazetarit se do e kalonte të gjithë këtë dhe do të kthehej sa më shpejt në shtëpi.
E shkatërruar nga dhimbja Ani shkruan se me ikjen e tij tani ajo ka mbetur vetëm.
“Mami të mori me vete, se të kishte pikën e dobët i dashur Kosta. Nuk e kisha menduar kurrë që do ndaheshim kaq shpejt. Shikoja ëndërra me sy hapur se si do t’i ngrysnim ditët e netët bashkë në të ardhmen.
Të kisha premtuar që do iknim bashkë nga ky spital ku të solla me duart e mia me shpresë se do ja dilnim. 55 ditë përpjekje. Nuk e mbajta fjalën e tani më ke lënë vetëm me kujtimet e atyre orëve e ditëve që kaluam bashkë. Kur do ikim me pyesje çdo ditë, Kur? Nuk po më shërojnë o Ani. E unë besoja që ti do ia dilje mbanë, sepse njerëzit si ty me atë zemër e shpirt të gjerë, me atë zgjuarsi e humor janë të rrallë në këtë tokë. Forca të thoja, je himariot kockëfortë e nuk dorëzohesh ti, do ja dalim e do ikim. Çdo ditë, çdo ditë të njëjtat fjalë.
Forca, je i fortë, me buzëqesh e ti me buzëqeshje e më shikoje thellë në sy sikur doje të vërtetoje fjalët e mia. Na presin të gjithë të thoja, djemtë e miqtë që luteshin për ty për një shërim sa më të shpejtë. Çfarë të them tani? Më fal që nuk të ndihmova ashtu si të kisha premtuar që do ktheheshim bashkë në Tiranë me këmbët tona? Do kthehemi, por me një ndryshim këmbët do t’i mbajmë në Vuno, tek mami e babi. O Kostë të thoja, hajde se do shërohesh e do ta kujtojmë si një ëndërr të keqe. Na ke lënë shurdh. Nuk qeshim e as nuk flasim pa u bërë mirë ti. Lëviz o ma lutesha përnatë. Eja të ndihmosh e të shërosh djalin. Ma more njeriun e vetëm që më kishte mbetur. Ma more vëllain më keni lënë vetëm!”,- shkruan ajo.
Gazetari dhe komentatori sportiv Kosta Grillo ka ndërruar jetë në moshën 59-vjeçare pas një beteje të gjatë me COVID-19.
