“Me Edi Ramën nëse je vrasës, bëhesh deputet, nëse ke qenë me Saliun, bëhesh deputet, nëse je i pasur bëhesh kryetar bashkie dhe nëse je i gjatë sa Rama, bëhesh minister”
“Rama bën koalicion me banditë”, kjo është një ndër akuzat e forta të deputetit të Partisë Socialiste, Ben Blushi ndaj kryeministrit Edi Rama njëherësh kryetar i PS-së. Në një intervistë për Top-Channal, Blushi hodhi akuza të forta ndaj Ramës ndër të cilat theksoi: “Me Edi Ramën nëse je vrasës, bëhesh deputet, nëse ke qenë me Saliun, bëhesh deputet, nëse je i pasur bëhesh kryetar bashkie dhe nëse je i gjatë sa Rama, bëhesh minister. Jemi partia e parë në Europë që perëndimi na ka thënë dekriminalizojeni, sepse ligji kaloi për ne. Por si hynë banditët në Partinë Socialiste? Si hynë këta? Asnjëri nuk hyri vetë, i futi mungesa e demokracisë brenda partisë”, tha Blushi.
Ai ka deklaruar ambicien e tij për të kandiduar për kryetar të PS-së, i bindur se do ta drejtojë këtë parti më mirë se ai. “Unë konkurroj se mendoj që e drejtoj PS më mirë se Edi Rama. E bëj më kolegjiale, më të hapur, një parti që nuk fut banditë dhe nuk zëvendëson ata që lexojnë me ata që kanë armë sepse kjo po ndodh. Kjo parti e drejtuar nga Edi Rama në këto 3 vjet nuk ka demokraci, ka kryetarë banditë nëpër degë, ka njerëz nga shekulli i kaluar që kanë zaptuar jugun.”, tha Blushi.
Një ndër akuzat e tij të forta është edhe ajo për 21 janarin. Sipas Blushit, në se Rama nuk do të kishte braktisur protestuesit, Berisha nuk do t’i kishte goditur ata me armë dhe për pasojë nuk do të ishin vrarë katër protestuesit e 21 janarit. Por akuzat e tij përqëndrohen edhe tek keqqeverisja. “Të gjithë vendimet që janë marrë kohët e fundit në Parlament dhe ato që janë tërësisht personale. Të gjitha koncesionet. Sot PS nuk është as e majtë dhe as e djathtë, është konfuze. Në 3 vjet varfëria është shtuar dhe ne nuk bëjmë aq sa duhet për të varfërit. Po si mund të bëjmë për të varfërit kur partia ka ose banditë ose të pasur. Si ka mundësi që në grupin tonë parlamentar janë 10 njërzit më të pasur në Shqipëri? Pse vijnë ata në një parti të majtë?”, tha Blushi.
