Pas pesë ditësh kërkime, është gjendur trupi i pajetë i minatorit Muharrem Plaku në Bulqizë. Mësohet se trupi i tij është gjetur në hapësirën e galerisë në një distancë rreth 450 metra në thellësi, i zënë poshtë nga materiali i shembur.
61-vjeçari Muharrem Plaku, dyshohet se u zu poshtë nga një masiv dheu ndërsa punonte në një nga galeritë e zonës D të minierës së Bulqizës.
Trupi i pajetë i minatorit është transportuar në morgun e spitalit të Bulqizës.
Kërkimet për gjetjen e minatorit u vështirësuan pasi në galeri, herë pas herë raportoheshin rrëshqitje dherash.
61-vjeçari, me profesion teknik mësohet se paraditen e së mërkurës ka qenë duke hapur frontin e ri të punës për minatorët që do të nxirrnin më pas mineralin e kromit, por dyshohet se në thellësi ka pësuar shembje pingule masivi shkëmbor.
