Drejtori i Policisë së Shtetit, Haki Çako po zhvillon një vizitë në SHBA ku është takuar me drejtuesit e lartë të disa agencive ligjzbatuese në SHBA. Bashkëpunimi në luftën kundër terrorizmit dhe rritja e bashkëpunimit dhe hetimeve të përbashkëta veçanërisht në fushën e trafikut të qenieve njerëzore ishin çëshjet kryesore që u diskutuan.
Fillimisht në NYPD, Departamentin e Policisë së New York (New York Police Department ), Drejtori i Policisë së Shtetit Haki Çako u prit në takim nga Drejtori i Policisë për Neë York City James P O’Neill NYPD Chief of Department.
“Zoti O’Neill e përgëzoi zotin Çako për rezultatet e Policisë Shqiptare në luftën kundër krimit të organizuar e terrorizmit. O’Neill e vleresoi si një partner të besueshëm e serioz Policinë Shqiptare” informon policia e shtetit përmes një njoftimi për shtyp të publikuar sot në mëngjes. O’Neill dhe Çako vlerësuan rolin e komunitetit shqiptar të punonjësve të policisë të NYPD, perfaqësuar nga Shoqata Illyrian, si ura të bashkëpunimit mes dy policive. Me pas Drejtori i Policisë së Shtetit Haki Çako u prit në takim nga Drejtori i Inteligjencës i Neës York City Thomas P Galati(njeherazi edhe Drejtor per Krimin e Organizuar e Terrorizmin).
Galati dhe Çako biseduan për çështjet e terrorizmit që shqetësojnë dy agjencitë, rritjen e bashkëpunimit dhe shkëmbimi të informacioneve në këtë fushë. “Galati- Çako vlerësuan lartë marrëveshjen e bashkëpunimit për shkembimin e informacionit në luftë kundër terrorizmit të firmosur nga Ministri Saimir Tahiri dhe Drejtori i FBI, si dhe portokollin operacional të firmosur nga Drejtori i Policisë së Shtetit dhe Drejtuesit e Antiterrorit.” “Zoti Galati e falënderoi zotin Çako, për punën e mrekullueshme dhe bashkëpunimin e shkëlqyer, në një rast të përbashkët hetimi për terrorizëm. Në këtë hetim u përfshinë FBI, Policia Shqiptare dhe Drejtoria e Inteligjencës së NYPD”
Zoti Çako theksoi se ne jemi të interesuar të përvetësojmë dhe të aplikojmë format dhe metodat me të mira të Policisë amerikane për të luftuar krimin e organizuar dhe terrorizmin. Drejtori i Inteligjencës Thmas P. Galati i ofroi Drejtorit të Policisë së Shtetit Haki Çako mbështetje për Strukturat Antiterror dhe të Krimit të Organizuar të Policisë Shqiptare. Gjithashtu me drejtues të Departamentit të Policisë së Neë York u diskutua për mundësitë e trajnimeve dhe specializimeve të oficerëve të Policisë shqiptare në Akademinë e Policisë në New York. Më pas delegacioni shqiptar vizitoi sallën e komandimit dhe monitorimit të emergjencave të Policisë në New York City.
