Një i ri është vënë në pranga nga policia, gjatë orëve të para të ditës së sotme.
Bëhet fjalë për Marlind Ymeraj, i cili duke udhëtuar me shpejtësi, jo vetëm që nuk i është bindur urdhrit të policisë, por ka thyer edhe dy postblloqe.
Për shkak të veprimeve të të riut, Ymerja, një punonjës policie me inicialet S. L., ndodhet në spital, pasi është dëmtuar rëndë në pjesën e këmbëve.
Njoftimi i Policisë së Tiranës:
33-vjeçari, i ndëshkuar administrativisht edhe tri herë të tjera brenda 10 ditëve, për manovra të rrezikshme dhe gara shpejtësie në qendrat e banuara.
Policia Rrugore i pezullon lejen e drejtimit, për mosbindje ndaj urdhrit të punonjësit të Policisë dhe qarkullim në sens të kundërt, i heq të gjitha pikët e lejes së drejtimit, e ndëshkon me vlerë maksimale 100.000 lekë të rinj dhe ndalim administrativ të mjetit për 1 muaj.
Specialistët për Hetimin e Krimit në Komisariatin e Policisë Nr. 2 bënë arrestimin në flagrancë të shtetasit Marlind Ymeri, 33 vjeç, banues në Tiranë, i dënuar më parë për vjedhje.
Rreth orës 03:00 të mëngjesit të sotëm, në sallën e Komandimit të DVP Tiranë kanë ardhur telefonata nga qytetarët se një mjet tip ‘Benz’ po xhironte gomat dhe po kryente manovra të rrezikshme. Menjëherë, në adresën e dhënë kanë shkuar shërbimet e Policisë Rrugore dhe të Komisariatit të Policisë Nr. 2, të cilët i kanë bërë shenjë ndalimi drejtuesit të mjetit.
Drejtuesi i mjetit, sapo ka konstatuar shërbimet e Policisë, ka shtuar shpejtësinë duke mos iu bindur urdhrit të punonjësit të Policisë për të ndaluar.
Në ndihmë të Patrullës së Përgjithshme ka shkuar edhe Forca e Posaçme ‘Shqiponjat’ dhe shërbimet e tjera, të cilët i kanë bllokuar rrugën automjetit, në bulevardin ‘Gjergj Fishta’, me qëllim që të ndalonte. Drejtuesi i mjetit përsëri nuk i është bindur urdhrit për ndalim, duke aksidentuar mjetin e Policisë dhe efektivin e ‘Shqiponjave’ dhe më pas është larguar. Punonjësi i policisë S. L. ndodhet në spital, pasi ka marrë dëmtime të rënda në pjesën e gjymtyrëve.
Drejtuesi i mjetit ka vijuar lëvizjen me shpejtësi, duke aksidentuar dhe një mjet tjetër të Policisë, por më pas është bërë i mundur ndalimi, neutralizimi dhe prangosja e tij.
Në përfundim të veprimeve u bë arrestimi në flagrancë i drejtuesit të mjetit, për veprat penale ‘Drejtim i mjetit në mënyrë të parregullt’, ‘Kundërshtim i punonjësit të policisë’, ‘Shkatërrim i pronës’ dhe materialet i kaluan Prokurorisë së Rrethit Gjyqësor Tiranë, për veprime të mëtejshme.
