Kryetari i grupit parlamentar të partisë demokratike, Edi Paloka doli sot në një konferecë për shtyp ku foli për skandalin e përgjimeve.
Sipas tij përgjimi i paligjshëm i kryer nga Saimir Tahiri, me dijeninë e Edi Ramës është një krim i rëndë shtetëror, pesha e të cilit rritet sa më shumë vonon zbardhja e tij, aq më shumë vonon hetimi i plotë e vendosja e përgjegjësve para ligjit.
Ai bëri të ditur se tashmë kanë kaluar muaj që kur skandali është bërë publik dhe se paisja është futur dhe përdorur në mënyrë ta paligjshme pa dijeninë dhe pa autorizimin e Prokurorit të Përgjithshëm.
Paloka theksoi se kjo është pranuar, mohuar e sërish pranuar nga Ministri i Brendshëm dhe Drejtori i Policisë së Shtetit si një shkelje e rëndë e ligjit dhe e kushtetutës dhe sipas tij këtë gjë e dëshmojnë deklaratat kontradiktore të tyre.
Kryetari i grupit parlamentar i bëri thirrje prokurorisë të tregojë vendosmëri e të mos lejojë pengimin e hetimit. Vendit dhe qytetarëve sot u intereson e vërteta rreth këtij krimi shtetëror. Të dalin para ligjit porositësit, kush e solli, kush e përdori, kë përgjuan, pse përgjuan, pse e mbajtën të fshehtë .Një hetim i plotë, i gjithanshëm, që nxjerr çdo përgjegjësi para ligjit, është domosdoshmëri për vendin, për të vendosur drejtësi e për të bërë që krime të tilla shtetërore të mos ndodhin më.
