“Mazhoranca e drejtuar nga Edi Rama ka fituar zgjedhjet në 2013 dhe 2015 dhe ska arsye për votbesim të kryetarit”
Kritikat e Ben Blushit, konsiderohen një debat i tejkaluar nga kryetari i PS-së së Tiranës Saimir Tahiri. Në një intervistë për Top-Channal, Tahiri tha se debati që hap kolegu i tij Blushi, është jashtë realitetit politik pasi sipas tij mazhoranca e majtë i ka fituar zgjedhjet në 2013 dhe 2015. “Më duket një debat që nuk shton shumë në sfidat që ka sot Shqipëria dhe mbi të gjitha te sfidat që ka qeverisja dhe mazhoranca. Sigurisht që ka mjaft përvoja, dhe ne në opozitë e zgjodhëm kryetarin me rregullin ‘një anëtar një votë’, është shumë demokratike, por edhe unë besoj që kur je në qeverisje, debati nuk është si zgjidhet kryetari i partisë. Debati është si votëbesohesh nga qytetarët. Unë nuk shoh ndonjë arsye për sa kohë kryetari i PS është kryeministër dhe votëbesohet nga qytetarët të mos ketë rregulla të diferencuara për konfirmimin e tij brenda partisë. Një mënyrë tjetër mund të jetë ajo me një procedurë tjetër votimi. Ky debat do të ishte i tillë nëse kryeministri do të humbiste zgjedhjet. Aty ka nevojë për debat. Unë hyj tek ata që besoj se nëse kryeministri humbet votëbesimin e qytetarëve, nuk ka asnjë mënyrë që të jetë më në krye të partisë. Deri në atë moment, debati është i tejkaluar besoj”, tha Tahiri.
