Gazetari Artan Hoxha ka reaguar pas rihapjes së çështjes së 21 Janarit duke e cilësuar atë një shans të ri për drejtësinë të hetojë edhe personat përgjegjës që penguan hetimet për 21 Janarin.
Përmes një statusi në Facebook, Hoxha shprehet se edhe pse kanë kaluar më shumë se 10 vite nga kjo ngjarje e rëndë ende nuk është zbardhur e vërteta për vrasjen e Aleks Nikës dhe Hekuran Dedës.
“Rihapja e hetimeve për dosjen e 21 janarit, është një shans i ri për të dhënë drejtësi, për një nga ngjarjet më të rënda të postkomunizmit… Edhe pse kanë kaluar më shumë se 10-të vite nga kjo ngjarje, e ndodhur në mes të bulevardit “Dëshmorët e Kombit”, përpara qindra kamerave të televizioneve, ende nuk është zbardhur e vërteta për vrasjen e Aleks Nikës dhe Hekuran Dedës.
Në gjykimin e parë, gjykata fajësoi me vendime qesharake ish-komandantin e Gardës së Republikës Ndre Prendi, për vrasjen e protestuesit Faik Murto, dhe ish-shefin e shtabit të njësisë speciale të Gardës së Republikës Agim Llupo, për vrasjen e protestuesit Ziver Veizi…
Rihapja e dosjes i jep mundësinë prokurorisë të hetojë edhe personat përgjegjës që penguan hetimet e 21 janarit?!
Pse dhe kush i fshiu pamjet e serverave të kryeministrisë?! Kush i mori në mbrojtje ekzekutorët e protestuesve dhe pengoi ekzekutimin e 6 urdhër-arresteve të prokurorisë?! Katër te vrarët dhe 13 të plagosurit e 21 janarit, nga armët e shtetit, kërkojnë drejtësi. Kjo mundësi duhet shfrytëzuar, që të paprekshmit të mos mbeten përjetësisht të paprekshëm….”, shkruan Artan Hoxha.
