Tedi Blushi, zëdhënësi i Presidentit të Republikës, ka deklaruar ditën e sotme se qeveria ka qenë në dijeni që Presidenti Meta ka pasur axhendë të përcaktuar në datë 6 maj, 2021.
Blushi thotë se në datë 28 prill, MEPJ i ka bërë një kërkesë për takim Presidentit me Ministren Federale për BE-në dhe Kushtetutën të Austrisë, znj.Karoline Edtstadler, kërkesë të cilës Meta i ka kthyer përgjigje pozitive në datë 29 maj.
Zëdhënësi i Metës vazhdon më tej sqarimin, duke thënë se në datë 5 maj në orën 14:00, Komisioni i Ligjeve i ka kërkuar Metës të marrë pjesë në mbledhjen e datës 6 muaj, duke qenë në dijeni sipas tij për axhendën e zënë të Metës.
Së fundmi, Blushi thekson se blofet e Kuvendit njëpartiak nuk çudisin më askënd, pasi ishte ky Kuvend, që për hir të Partisë i shtoi kushtet e integrimit europian Shqipërisë dhe shkallmoi pabesisht Marrëveshjen ndërpartiake të 5 Qershorit për Kodin Zgjedhor, pasojat e së cilës janë skandaloze me shumëfishim të krimeve zgjedhore.
Rikujtojmë se mazhoranca ka marrë iniciativën për të shkarkuar Presidentin e vendit Ilir Meta, pasi sipas tyre ai ka ndërhyrë në zgjedhjet e 25 prillit. Iniciativa është firmosur nga 49 deputetë socialistë, megjithatë mbetet të shihet nëse mazhoranca aktuale do t’ia arrijë qëllimt, duke qenë se parlamentit aktual i kanë mbetur vetëm dy muaj kohë dhe shkarkimi i Metës kërkon 94 vota.
Ditën e sotme, Komisioni i Ligjeve miratoi iniciativën e 49 deputetëve dhe i hapi rrugë krijimit të Komisionit Hetimor. Miratimi i këtij komisioni do të votohet në seancën parlamentare të radhës.
Postimi i plotë:
Në përgjigje të interesimit të kolegëve gazetarë dhe pasi u njohëm me shpifjet dhe qëndrimet aspak korrekte të deputetëve të Kuvendit njëpartiak, lidhur me arsyet e mospranisë së Presidentit të Republikës, Sh.T.Z Ilir Meta në mbledhjen e sotme të Komisionit për Çështjet Ligjore, sqarojmë se:
Në datën 28 prill 2021, siç faktohet edhe nëpërmjet këtij komunikimi zyrtar me Ministrinë për Europën dhe Punët e Jashtme, Presidenti i Republikës është vënë në dijeni me një kërkesë për takim, për në datën 6 maj 2021, të Ministres Federale për BE-në dhe Kushtetutën të Austrisë, znj.Karoline Edtstadler.
Në datën 29 prill 2021, Drejtori i Kabinetit të Presidentit, në përgjigjen e dërguar për MEPJ ka shprehur zyrtarisht vullnetin e Kreut të Shtetit për takimin me znj.Edtstadler dhe po këtë ditë Drejtoria e Protokollit të Shtetit ka sugjeruar që takimi, sipas axhendës së përgatitur në bashkëpunim me Ambasadën e Austrisë në Tiranë, të zhvillohej më datë 6 maj 2021, në orën 11:15 – 11:55.
Edhe ky sugjerim i propozuar, është mirëpritur nga ana e Presidentit Meta dhe është fiksuar në axhendë po atë ditë, më 29 prill 2021.
Ndërkohë në datën 5 maj 2021, Komisioni për Çështjet Ligjore, me anë të një komunikimi të përcjellë në rrugë elektronike dhe shkresore pas orës 14:00 në Institucionin e Presidentit të Republikës, ka kërkuar, që Kryetari i Shtetit të marrë pjesë në datën 6 maj 2021, ora 11:00, në një seancë dëgjimore.
Presidenti Meta, siç është bërë me dije edhe në shkresat e Presidencës me nr. prot.1520/2, datë 5.5.2021 dhe nr. prot. 1533/2, datë 6.5.2021, drejtuar Komisionit për Çështjet Ligjore, ka shprehur gadishmërinë e Tij për t`u takuar, diskutuar e për t`u shprehur me dhe në Komisionin e Ligjeve, por në datën 10 maj 2021.
Kjo edhe për shkak se axhenda e Tij për datën 6 maj 2021, ishte e paracaktuar dhe për këtë ka qenë në dijeni edhe Qeveria, siç faktohet nga këto dy dokumenta, që provojnë edhe njëherë nivelin banal të akuzave dhe shpifjeve të sotme të deputetëve të Kuvendit njëpartiak, gjoja për shmangien e Presidentit nga ballafaqimi me ta.
Ky komunikim zyrtar mes Institucionit të Presidentit dhe MEPJ, vërteton botërisht jo vetëm se Qeveria, nga i merr urdhërat Kuvendi njëpartiak, ishte në dijeni të axhendës së sotme të Kreut të Shtetit, por fakton para të gjithë shqiptarëve edhe banalitetin e pretendimeve të deputetëve në skadim mandati.
Sigurisht, që Presidenti i Republikës, nuk mund të anulonte apo të shmangte sot agjendën e Tij, të datës 6 maj 2021, ditë kjo në të cilën ishin të planifikuara prej kohësh, realizimi i takimeve me rëndësi edhe për proceset e integrimit të vonuar europian të vendit, siç ishte edhe takimi i mëpasshëm me Presidentin e Sllovenisë, Sh.T.Z Borut Pahor.
Blofet e Kuvendit njëpartiak nuk çudisin më askënd, pasi ishte ky Kuvend, që për hir të Partisë i shtoi kushtet e integrimit europian Shqipërisë dhe shkallmoi pabesisht Marrëveshjen ndërpartiake të 5 Qershorit për Kodin Zgjedhor, pasojat e së cilës janë skandaloze me shumëfishim të krimeve zgjedhore.
