“Operacionet në terminalin e PIA-s janë pezulluar deri në mbyllje të hetimit”
Kompania e nxjerrjes së naftës në fushën e Patos Marinzës ka ndërprerë sot prodhimin. Lajmi bëhet i ditur nga vetë kompania e cila në njoftim për mediat sqaron se shkak është bërë pamundësia e eksportit të produktit. Kjo sepse, pas ndotjes me naftë që u shkaktua pak ditë më parë në bregun e Zvërnecit nga një anije transporti është bllokuar puna në terminalin e Petroliferës. Në njoftyimin e dalë nga Bankers thuhet:
“Bankers Petroleum Ltd njofton për një ndikim të përkohshëm në prodhim nga një ndërprerje e aktivitetit të terminalit portual të Petroliferës Italo-Shqiptare (“PIA”) në Vlorë, Shqipëri, për shkak të një rrjedhjeje të naftës së papërpunuar që ndodhi në këtë terminal ditën e dielë, 22 maj gjatë ngarkimit të një anijeje. Nafta e papërpunuar është pastruar tashmë, megjithatë operacionet në terminalin e PIA-s janë pezulluar, ndërsa autoritetet vendase po kryejnë një hetim mbi incidentin.
Pezullimi i terminalit të eksportit ka çuar në një mungesë depozitimi të naftës së papërpunuar në Port por edhe në fushën e Patos-Marinzës gjithashtu. Për të përballuar këtë situatë, Bankers do të fillojë të reduktojë prodhimin e naftës sot, më 1 Qershor, çka mund të çojë në një mbyllje të fushës në dy ditët e ardhshme, si pasojë e pamundësisë për të eksportuar naftë të papërpunuar në port. Pezullimi i PIA-s pritet të hiqet në ditët e ardhshme, duke lejuar Bankers-in të rifillojë operacionet e tij si zakonisht”.
