Federata Shqiptare e Futbollit ka reaguar pas incidentit të ndodhur në Mirditë ku një futbollistë goditi arbitrin.
FSHF shkruan se e dënon incidentin, ndërsa bën me dije se organet e drejtësisë sportive do të mblidhen me urgjencë për këtë ngjarje të rëndë.
Ndërkohë më tej, FSHF i bën thirrje të gjithë drejtuesve të klubeve dhe lojtarëve të respektojnë rregullat dhe të shmangin aktet e dhunshme.
FSHF:
Federata Shqiptare e Futbollit dënon incidentin e ndodhur gjatë ndeshjes KF Sopoti-KF Mirdita, e vlefshme për javën e 23-të të Kategorisë së Dytë, Grupi A dhe që luhej në stadiumin e Cërrikut.
Në minutën e 44-t, një lojtar i Mirditës ka goditur gjyqtarin e takimit, duke sjellë edhe ndërprerjen e takimit.
Organet e drejtësisë sportive do të mblidhen me urgjencë për këtë ngjarje kaq të rëndë, e cila njollos gjithë futbollin.
I bëjmë thirrje drejtuesve të klubeve dhe lojtarëve të respektojnë rregullat “fair play”, të shmangin dhe të parandalojnë akte të tilla të dhunshme, që nuk duhet kurrsesi të kenë vend në futboll.
