Pëllumb Petriti akuzohet si i implikuar në dosjen e fallsifikimit të dokumenteve për 220 ha tokë në Gadishullin e Karaburunit me vlerë 100 milionë euro
Kryetari i PR-së Vlorë, biznesmeni Pëllumb Petriti është shpallur në kërkim nga policia për dosjen e 220 ha tokë në Gadishullin e Karaburunit me vlerë 100 milionë euro. Për këtë çeshtje policia e Vlorës arrestoi mbrëmë një avokat dhe një notere të cilët akuzohen për veprat penale “Shpërdorim detyre” dhe “Falsifikim dokumentash”.
Të arrestuarit janë noterja Belona Seraj, 29 vjeç, banuese në Vlorë dhe avokati Enkes Hysendhima, 35 vjeç, banues në Orikum. “Në bazë të këtij hetimi të përbashkët, duke filluar me sekuestrimin të kësaj sipërfaqe të gjërë toke, janë ushtruar kontrolle nëpër banesat dhe zyrat e këtyre shtetasve dhe janë gjetur gjurmë dhe prova të cilat janë sekuestruar në cilësinë e provës materiale, në ngarkim të shtetasve të mësipërm për veprat penale “Shpërdorim detyre” dhe “Falsifikim dokumentash”, informon prokuroria.
Në vijim të kontrollit u gjetën një numër i lartë dokumentesh të fallsifikuaradhe në bazë të këtyre rezultateve, është ndërhyrë me arrestimin në flagrancë të këtyre personave nga ana e Policisë. Prokuroria e Vlorës po vijon hetimin për rastin, ku dyshohet se janë përfshirë edhe persona të tjerë.
Ejona Zenelhasani
